ఇదిగో నవలోకం...

విద్యుత్ లేకుంటేనేం... పవన విద్యుత్ సాయంతో సెల్ ఫోన్ ఛార్జింగ్ చేసుకోండి అని పిలుపునిస్తున్నారు పాండిచ్చేరి లాస్‌పేట పాలిటెక్నిక్ మహిళా కళాశాల ఎలక్ట్రానిక్స్ కమ్యూనికేషన్ విద్యార్థినులు. ఈ కళాశాలకు చెందిన అష్టలక్ష్మి, ప్రియ, చార్మిరోస్, విజయలక్ష్మి, శ్రీదేవి, తమిళ్ సెల్వి ఒక జట్టుగా ఏర్పడి పవన విద్యుత్ ఆధారంగా పనిచేసే సెల్ ఛార్జర్‌ని కనిపెట్టారు. చాలా చిన్న ఫ్యాన్ జోడించిన మోటార్ ద్వారా ఇది పనిచేస్తుంది. బలంగా గాలి వీచినప్పుడు ఈ ఫ్యాన్ తిరుగుతూండగా ఎలక్ట్రిక్ జనరేటర్ తరహాలో ఈ మోటార్ ఉత్పత్తి చేసే విద్యుచ్ఛక్తితో బ్యాటరీ ఛార్జి సర్క్యూట్ పని చేస్తుంది. దీంతో బ్యాకప్ బ్యాటరీని సులువుగా ఛార్జి చెయ్యవచ్చంటున్నారు ఈ విద్యార్థినులు. ముఖ్యంగా వాహనాల్లో ప్రయాణించేటప్పుడు ఈ పరికరం వైరును సెల్‌కు తగిలించి, దానికి (పరికరానికి) ఎదురుగాలి వీచేలా ఉంచితే ఫ్యాన్ వేగంగా తిరుగుతూ ఛార్జింగ్ చేసేస్తుంది. తొలుత నోకియా సెట్లలోని 3.7 వోల్ట్ బ్యాటరీకి ఛార్జి చేసేలా దీనిని తయారు చేశారు. భవిష్యత్తులో దీని సామర్థ్యం పెంచుతామని విద్యార్థినులు చెప్పారు.

బుర్ర పాదరసంలా పని చేస్తే... బోలెడు ఆవిష్కరణలు చెయ్యొచ్చు. అందుకు ఉదాహరణ తమిళనాడులోని విరుదునగర్ జిల్లా రాజపాళెంకు చెందిన అరుణ్ పాంఢ్యన్ (17). ఇతనికి 11 ఏళ్ళ వయసు ఉన్నప్పుడే బ్యాటరీ సాయంతో పనిచేసేలా అరచేతిలో పట్టేంత ఫంకా (ఫ్యాన్)ను తయారు చేశాడు. అరుణ్ తండ్రి గణేశన్ ఒక మిల్లులో పనిచేస్తున్నారు. తల్లి భవాని ఒక ప్రాథమిక పాఠశాలలో ఉపాధ్యాయురాలు. ఇక్కడి అన్నప్పరాజా స్మారక ఉన్నత పాఠశాలలో చదివిన పాండ్యన్ తన పాఠశాలలోని గ్రంథాలయ నిర్వాహకుడు సుబ్రమణ్యం సాయంతో ఎన్నో శాస్త్ర సాంకేతిక విషయాలు తెలుసుకుని ఆయనిచ్చిన స్ఫూర్తి, ప్రోత్సాహంతో ముందడుగేశాడు. తాను నేర్చుకున్న విషయాలను తనకంటే పై తరగతి విద్యార్థులకు సైతం బోధించాడు. ఇతన్ని ఆదర్శంగా తీసుకున్న పలువురు విద్యార్థులు తమ దృష్టిని పరిశోధనలవైపు మళ్లించారు. నవలోకమంటే ఎక్కడో లేదు. ఇక్కడే ఉంది.